ឯកឧត្តមឧបនាយករដ្ឋមន្ត្រី សាយ សំអាល់ ផ្ញើរត្រាក់ទ័រ ១គ្រឿងជូនសហគមន៍កសិកម្មព្រៃតាព្រឹត សាមគ្គីមានជ័យ ក្នុងឃុំស្តេចគង់ខាងលិច និងសហគមន៍បន្លែព្រៃធំ បៃតង ឃុំទូកមាសខាងលិច ស្រុកបន្ទាយមាស ដើម្បីចូលរួមពង្រីកផ្ទៃដីដាំដុះ កាត់បន្ថយថ្លៃដើម ធានាសុវត្ថិភាពស្បៀង និងបង្កើនចំណូលរបស់ប្រជាកសិករយើង នាថ្ងៃទី១៦ ខែវិច្ឆិកា ឆ្នាំ២០២៥ ។
ឯកឧត្តមឧបនាយករដ្ឋមន្ត្រី សាយ សំអាល់៖ ក្នុងគោលដៅសំដៅធានានិរន្តភាពជីវភាព ក្រុមការងាររាជរដ្ឋាភិបាលចុះមូលដ្ឋានស្រុកបន្ទាយមាស តាមរយៈគម្រោងវិនិយោគខ្នាតតូច បានផ្តល់ត្រាក់ទ័រ ដែលជាមធ្យោបាយដ៏ចាំបាច់មួយសម្រាប់ជួយដល់ការបង្កើនប្រសិទ្ធភាពនៃការដាំដុះរបស់បងប្អូនសហគមន៍កសិកម្មព្រៃតាព្រឹត។
បងប្អូនសហគមន៍កសិកម្មព្រៃតាព្រឹត នៅភូមសាមគ្គីមានជ័យ ឃុំស្តេចគង់ខាងលិច ស្រុកបន្ទាយមាស មានរបរចិញ្ចឹមជីវិតដោយការដាំដុះបន្លែ ដោយប្រើមធ្យោបាយភ្ជួររាស់ និងប្រមូលផលតាមលក្ខណៈប្រពៃណី។ ការអនុវត្តនេះ បានផ្តល់ចំណូលជូនបងប្អូនសហគមន៍ដែលត្រឹមតែធានាចំណាយជីវភាពប្រចាំថ្ងៃ និងមិនទាន់អាចសន្សំគ្រប់សម្រាប់ចំណាយលើសម្ភារ និងមធ្យោបាយសម្រាប់បង្កើនប្រសិទ្ធភាពបង្កបង្កើនផលនៅឡើយ។
ការវិនិយោគខ្នាតតូចនេះ នឹងចូលរួមចំណែកបង្កើនប្រសិទ្ធភាពនៃការដាំដុះបង្កបង្កើនផល និងបង្កើនចំណូលជាប្រចាំរបស់បងប្អូនសហគមន៍ផង ព្រមទាំងបង្កើនលទ្ធភាពសន្សំរបស់សហគមន៍សម្រាប់ធានាចំណាយផ្សេងៗ ក្នុងគោលដៅលើកកម្ពស់ជីវភាពរបស់គាត់។
